11. September

Knattspyrnufélagið Puma vottar Bandaríkjamönnum sem og öðrum hlutaðeigandi samúð sína að tilefni þess að 6 ár eru nú liðin frá hryðjuverkaárásum á tvíburaturnana í New York. 

Einnig vill Púman heiðra minningu og votta aðstandendum Ásgeirs Elíassonar fyllstu samúðaróska með sviplegt andlát þess merka manns. Knattspyrnan á Íslandi er fátækari eftir brotthvarf þessa afreksmanns í þjálfun. Ásgeir átti ríkan þátt í því að skapa margan góðan knattspyrnumanninn, og heilu liðin sem ávallt höfðu það að leiðarljósi að spila áferðarfallega og umfram allt skemmtilega knattspyrnu. Fram, Þróttur, Landsliðið og nú síðast  ÍR  nutu krafta Ásgeirs og oftast nær með frábærum árangri, en Ásgeir hóf feril sinn sem þjálfari árið 1975 með Víkingi Ólafsvík.  Menn vilja meina að þar hafi hann séð og lært hvernig á að spila fótbolta ...fyrir áhorfendur !

Við birtum hér meðfylgjandi uppfærða stöðu mála í A-riðli fyrir lokaleikinn gegn TLC á sunnudag.  Ekki er vitað hvenær leikur Punga og TLC, sem var frestað fyrr í sumar, verður leikinn. Ljóst er að sá leikur hefur gríðarmikla þýðingu fyrir okkar menn og mun skera úr um hvort liðið fer áfram í úrslitakeppni Utandeildar. En ef-in eru mörg og stór þannig að Púmur skulu forðast það að hugsa um mikið meira en einn leik í einu.

   

	L	U	J	T	Mörk	Stig
1. Vængir Júpiters	8	7	1	0	36:7	22
2. Elliði	9	6	2	1	21:9	20
3. TLC	8	6	1	1	32:16	19
4. Puma	9	5	1	3	21:12	16
5. Dufþakur	9	4	3	2	23:16	15
6. Hjörleifur	8	4	1	3	21:17	13

  

- Ritstjórn.

Stjörnuhrap í Fagralundi

Leikið var í Fagralundi í gærkvöld þegar heldri manna lið HK fékk lið Stjörnunnar úr Garðabæ í heimsókn. Ekki var útlit fyrir góða mætingu en þegar flautað var til leiks voru aðeins tíu menn í hvoru liði.

Nokkrar Pumur voru mættar, tilbúnar að gefa sig í það verðuga verkefni sem var framundan. Stjarnan var búin að leika vel fram að þessum leik og voru HK-ingar allt að því pínu smeykir fyrir verkefni dagsins. Það kom þó á daginn að lið HK átti fína spretti og fjöldann allan af færum. Það voru hins vegar Garðbæingar sem skoruðu fyrsta mark leiksins, en það var hinn magnaði What's His Name, sem skoraði með föstum skalla, sem Böðvar Jónsson varði inn, eftir fallega fyrirgjöf frá Hvað Sem Hann Nú Heitir, 0-1.

Í seinni hálfleik tóku HK-ingar sig til í andlitinu og settu kraft í leikinn. Úr því varð að Tryggvi Valsson skoraði eftir stórglæsilega sendingu frá Ívari Jónssyni, sem gaf boltann frá miðju vallarins inn fyrir vörn Stjörnumanna þar sem Tryggvi tók laglega við boltanum og setti hann í fær hornið, óverjandi fyrir markvörð Garðbæinga, 1-1.

Bæði lið sóttu það sem eftir var leiks og áttu ágæt færi. Það voru hins vegar bæði markmenn liðana sem komu í veg fyrir mörk sem og sóknartilburðir leikmanna, sem voru oft á tíma ekki hátt skrifaðir í leiknum. Vigfús Þórisson átti stórleik í vörn HK og bjargaði oft liðinu frá því að fá sóknarmenn Stjörnunnar eina á móti markverði.

HK komst svo yfir um miðjan seinni hálfleik. Þar var aftur á ferðinni Tryggi sem skoraði fallegt mark eftir góða samvinnu leikmanna HK, 2-1. Vésteinn Gauti Hauksson, markahæsti leikmaður Puma í sumar, skoraði svo þriðja mark HK, eftir að liðið hafði átt nokkur kjörin tækifæri til að skora. Fallegt mark þar sem Viðar Ingi Pétursson átti framúrstefnulega sendingu af hægri væng í fang Vésteins sem gulltryggði HK-ingum sigurinn, 3-1.

Fínn leikur og góð æfing. Vinnusigur HK-inga þar sem lið Stjörnunnar var sterkt, en þess má geta að þeir léku 10 allan leikinn.

Eftirtaldir leikmenn Puma léku með HK: Böðvar, Vigfús, Viðar, Vésteinn.

 - Ritstjórn

Drottnun á Völlunum

Að vana var það myndarhópur sem var mættur á Ásvelli í gær sunnudag til að etja kappi við lið Kónga í níundu og næst síðustu umferð Utandeildarinnar. Mættir voru 17 leikmenn sem staðráðnir voru í því að keyra sig út og ná þeim þremur stigum sem hægt var að fá úr leiknum. Ljóst var fyrir leikinn að Puma ætti að stjórna þessum leik, því leikmenn Kónga voru aðeins 11 talsins og því ekki með menn til skiptinga. Það fór á þann veginn og stjórnuðu leikmenn Puma leiknum frá upphafi til enda. Fjöldinn allur af færum sköpuðust í leiknum, en það var enginn annar en Vésteinn Gauti Hauksson sem skoraði fyrsta mark leiksins, á 15 mínútu, eftir glæsilega sendingu frá Árna Þór Eyþórssyni, en Vésteinn renndi boltanum í autt markið eftir sýnikennslu í skógarferð frá markmanni Kónga, 1-0. Eftir það áttu Puma eins og áður sagði fjöldann allan af færum sem hefðu á góðum degi átt að skila sér í mark andstæðingana. Staðan í hálfleik, 1-0 fyrir Puma.

Lítilsháttar breytingar voru gerðar á liði Puma í hálfleik. Puma hélt áfram þeim hætti sem skilið var við í fyrri hálfleik. Sótt var stíft að marki Kónga og ljóst var að Puma átti eftir að bæta við mörkum. Það var svo Árni sem skoraði annað mark liðsins. Eftir stórsókn Puma fékk Árni boltann fyrir fæturna í miðjum teig Kónga og nelgdi tuðrunni af öllum krafti, þannig að markmaður Kónga réð ekki við hann og slóg hann í slánna og inn í mark. Stórglæsilegt mark Árna sem gæti orðið mark leiktíðarinnar, 2-0.

En hélt Puma að sækja og létu færin ekki á sér sitja. Þó vildu ekki allir boltar fara í markið, en leikmenn Puma hafa oft í sumar verið óheppnir að klára ekki þann fjölda færa sem þeir hafa fengið. Vésteinn skoraði hins vegar þriðja mark leiksins , eftir að Viðar Ingi Pétursson hafði sprengt upp vörnina með hlaupi upp kantinn, sent inn í teig þar á Már Þórarinsson sem lagði boltann út á  Véstein sem skoraði þriðja mark leiksins, 3-0.

Sigur Puma staðreynd í skemmtilegum leik. Þó eins og áður segir hefðu mörk Puma mátt vera fleiri, en leikmenn voru sammála eftir leikinn að sanngjörn úrslit hefðu átt að vera 6-0 Puma í vil. Vörn Puma var með sterkasta móti í þessum leik þar sem valinn maður var í hverri stöðu. Vörnin stóð sína plikt þar sem engin hætta skapaðist og áttu Kóngar varla færi í leiknum. Markverðir Puma, Þorleifur Óskarsson og Guðmundur Magnús Sigurbjörnsson, sem skiptu leiknum á milli sín þurftu ekki að taka á honum stóra sínum en voru þó nauðsynlegir og að vanda á sínum stað....á milli stanganna.

Byrjunarlið.
Þorleifur
Hreiðar - Alexander - Vigfús - Evert
Annel - Árni - Benni - Viðar
Ívar - Vésteinn

Bekkur: Böðvar, Guðmundur, Már Þ, Már J, Þórhallur, Arnar

Mörk: Vésteinn (2), Árni

Maður leiksins: Vésteinn Gauti Hauksson. Að vana var BRJÁLAÐUR allan leikinn og hvatti menn eins og herforingi áfram á vellinum. Skoraði tvö mörk og er eftir leikinn einn af markahæstu mönnum deildarinnar með 13 mörk.

 - Ritstjórn

Old-Boys: HK – Stjarnan

Í kvöld kl. 18:30 munu heldri-menn Handknattleiksfélags Kópavogs taka á móti Stjörnunni í Fagralundi. Þetta er 5. leikur sumarsins hjá HK-ingum. Liðið hefur unnið Leikni (0-4), gert jafntefli við Þrótt (2-2) en tapað gegn Keflavík (1-4) og ÍR (3-7). Þeim sem sjá sér fært að mæta í þetta skemmtilega verkefni er bent á að leikurinn hefst kl. 18:30 þannig að æskilegt er að menn séu mættir um kl. 18. Varla þarf að taka það fram að þessir leikir eru eingöngu ætlaðir 30 ára og eldri.

Ritstjórn leyfir sér að stórefast um að nokkur maður sé stífur eða þreyttur eftir göngubolta gærkvöldsins, og hvetur “eldri-menn” Puma til að láta sjá sig.

- Ritstjórn.

Kóngarnir á sunnudag

Puma – Kóngarnir.  Ásvellir, sunnud. 9. sept. kl. 19:30

Kóngum hefur gengið brösulega í sumar. Þeirra stærstu stundir hafa verið stórsigur gegn Pungmennafélaginu í 2. umferð auk 3-3 jafnteflis við Dufþak sem kom í kjölfar afleitra úrslita gegn Vængjum og Hjörleifi. Einnig náði liðið í 2. umferð í bikarnum með sigri á Vatnaliljum sem þeir svo töpuðu gegn í deildarkeppninni.  Ekki hefur tekist að fá það staðfest, en líklegt þykir að Kóngarnir hafi farið ansi nærri því að slá metið sem stærsta tapið í Utandeildinni, er þeir lágu eftirminnilega gegn Vængjum; 17-0 í 6. umferð.  Forðast skal þó að dæma liðið eftir þeirri frammistöðu, því komið hefur í ljós að Kóngarnir voru ansi fáliðaðir og e.t.v. illa mannaðir  þetta örlagaríka kvöld. 
Hér að neðan fylgja svo úrslit sumarsins hjá mótherjum Puma á sunnudag.

 A-riðill  úrslit:
Kóngarnir – TLC :          1-4 
Kóngarnir – Pungar :      7-1
Kóngarnir – Dinamo:      3-0  (kærusigur, tap á velli)
Kóngarnir – Vatnaliljur:   0-1
Kóngarnir – Elliði :         2-4
Kóngarnir – Vængir :     0-17
Kónganir – Hjörleifur :    1-6
Kóngarnir – Dufþakur :   3-3

Bikarkeppni:
Kóngarnir – Vatnaliljur : 3-2
Kóngarnir – BYGG :      0-2  

Ef þessi úrslit eru tekin saman er niðurstaðan sú að Kóngarnir hafa leikið 10 leiki alls, sigrað 3, gert 1 jafntefli og tapað 6 leikjum.  Markatalan er ansi skrautleg, eða 23 mörk skoruð, gegn 42 mörkum andstæðinga. Ef eitthvað er að marka tölfræðina á heimasíðu Utandeildarinnar er Hlynur Guðlaugsson þeirra markahæstur með 7 mörk,  og þar af þrenna í bikarleiknum gegn Vatnaliljum.

Leikurinn fer fram eins og áður segir á sunnudag kl. 19:30, leikmenn eru vinsamlegast beðnir um að mæta eigi mikið síðar en 45 mínútum áður, eða kl. 18:45.

 Áfengisbann tekur gildi kl. 05:00, aðfararnótt laugardags   ...Hreiðar!

- Ritstjórn.

DRAUMURINN LIFIR !!!

Í gærkvöldi voru leiknir 4 leiki í A-riðli Utandeildarinnar.  Efsta lið riðilsins, Vængir Júpíters, öttu kappi við það neðsta, P. Gulla, og sigruðu með 2 mörkum gegn engu.  Hjörleifur tapaði 2 rándýrum stigum í toppbaráttunni með 2-2 jafntefli við Geirfugla, á meðan Elliði styrkti stöðu sína í í topp þremur með öruggum 6-1 sigri á Dinamo Gym80. Elliði komst þar með í 2. sætið á kostnað TLC sem gerði 4-4 jafntefli í dramatískum leik við Dufþak.  TLC leiddi 3-0 í hálfleik og virtust vera að landa 3 öruggum stigum. Duffinn kom hinsvegar grimmur til leiks í seinni hálfleik og voru búnir að jafna eftir korters leik. TLC náði náði svo forystunni aftur, en Duffi jafnaði með lokaspyrnu leiksins.

Staðan í efri hluta A-riðils er þá orðin þessi, þegar 2 umferðum er ólokið hjá flestum:                                        
                    Leikir - Stig
Vængir             8  - 22
Elliði                9 – 20
TLC                 8 – 19
----------------------------------
Duffi                9 - 15  
Puma             8 - 13  
Hjölli               8 – 13


Þegar rýnt er í stöðu mála sjá menn greinilega að möguleikinn á sæti í úrslitakeppninni er ljóslifandi.  TLC sem situr í 3ja og síðasta sætinu í úrslit, á fyrir höndum erfiða leiki gegn PUMA og Pungum í lokaumferðunum. Hjörleifur lúrir þó í 6. sætinu með jafnmörg stig og Puma en aðeins lakari markatölu.  Hjöllinn á eftir leiki gegn;  Pungmennafélaginu og V.Júpiters.   Ef draumurinn á að ganga eftir verða okkar menn að sigra Kónga og TLC  með sannfærandi hætti, og vona að Hjörleifs-menn missi stig, sem verður að teljast líklegra en ekki gegn Vængjum þó ekkert sé fyrirséð í þessum efnum.  Þetta er nú ekki flóknara en svo !

- Ritstjórn.

 

Framundan hjá Púmunni

Senn líður að vertíðarlokum þetta sumarið  og því  vert að skoða og skrásetja dagskránna sem framundan er.

Fimmtud.  6. sept.             - Æfing í Fagralundi  kl. 19:30
Sunnud. 9. sept.                - Puma vs. Kóngarnir  kl. 19:30
Mánud. 10. ssept.             - Æfing í Fagralundi  kl. 21:30
Fimmtud. 13. sept.            - Æfing í Fagralundi  kl. 19:30
Sunnud. 16. sept.              - Puma vs. TLC    kl. 19:30
Mánud. 17. sept.                - Létt æfing + Aðalfundur part. 1

Framkvæmdastjórn fyrirhugar að halda Uppskeruhátíð Puma 2007 , þar sem meðal annars verða veitt verðlaun, viðurkenningar  sem og áminningar fyrir vel og miður unnin störf á yfirstandandi tímabili. Ekki er komin dags- eða staðsetning á þessari merku uppákomu, en Ritstjórn mun færa ykkur þær fregnir um leið og það skýrist.  Byrjið því að skrifa ræðurnar tímanlega og hugið að atkvæðagreiðslu m.a. fyrir leikmann ársins, fallegasta mark ársins, dólgur ársins  o.s.frv.  Búast má fastlega við að boðið verði uppá veglega veislu með mat og drykk, en verðinu stillt í hóf eins og mögulegt er.  Allar hugmyndir að verðlaunum og viðurkenningum eru vel þegnar  s.s.  mestu framfarir, flottastur-á-velli  og þar fram eftir götunum.  Staða veislustjóra er laus til umsóknar.  Þess ber eindregið að geta að á þessu samkomu er skyldumæting!  

 - Ritstjórn.

(Ritstjórn  & Frkv.stjórn setur fyrirvara á að svo gæti farið að af  hátíðinni verði ekki, ef undirtektir leik- og starfsmanna eru dræmar. Vinsamlegast sýnið  viðleitni )

Menning: Lífvísindi

Í síðustu viku stikluðum við á stóru um Púma-manninn úr  heimi kvikmynda. Menningarmolinn þessa vikuna kemur hinsvegar úr flokki lífvísinda, nánar tiltekið dýrafræði. Nauðsynlegt verður að teljast að Púmur þekkji arfleið sína og sögu. Eitt af þeim mikilvægu atriðum er að þekkja skepnuna sem félagið kennir sig við.  

Púma (Puma concolor), sem einnig kallast fjallaljón, er kattardýr af undirættinni Felinae (smákettir) og er eina tegundin innan Puma-ættkvíslarinnar. Þó Púmur teljist til smákatta eru þau tiltölulega stór, karldýrin eru á bilinu 36 til 120 kg að þyngd og kvendýrin 29 til 64 kg. Litur þeirra er nokkuð breytilegur, frá gulbrúnum yfir í grábrúnan.

Púmur lifa í Norður- og Suður-Ameríku. Ekkert spendýr á meginlandi Ameríku hefur jafn mikla útbreiðslu og fjallaljón, eða frá Eldlandi syðst í Suður-Ameríku, allt norður til suðausturhluta Alaska í Norður-Ameríku. Fjallaljón hafa því aðlagast mjög ólíkum búsvæðum, svo sem hálfeyðimerkum, barrskógum, gresjum, kjarrlendi, staktrjáasléttum, regnskógum og fjalllendi. Eins og flestar aðrar kattategundir mynda fress fjallaljóna óðul sem innihalda óðul nokkurra kvendýra. Dýrin fara reglulega um óðulin og pissa upp við tré til að merkja óðalsmörkin. Óðulin eru misstór og helgast stærðin helst af fæðuframboði og landfræðilegri legu. Eftir því sem nær dregur miðbaug eru óðulin minni, en óðul í fjalllendi eru þó gjarnan afar stór. Óðul kvendýra geta verið frá 26 til 350 km², en óðul karldýranna eru frá 140 til 760 km² . Líkt og kettir almennt (að ljónum undanskildum) eru Púmur að mestu einfarar, nema hvað fullorðin dýr geta umborið hvor önnur í fjóra til sex daga á æxlunartíma. Auk þess virðast bræður halda saman í nokkra mánuði eftir að þeir yfirgefa móður sína.

Rannsóknir hafa sýnt að læðurnar gjóta að meðaltali á tveggja ára fresti og er gotstærðin frá einum og allt upp í sex kettlinga. Meðgöngutíminn er á bilinu 82-96 dagar og eru kettlingarnir á spena í allt að 40-45 daga. Rannsóknir hafa sýnt að fjallaljón verða yfirleitt ekki eldri en 12 ára.

Púmur eru kjötætur eins og önnur kattardýr. Það er alltof löng upptalning að nefna öll þau dýr sem fjallaljón veiða sér til matar en í stuttu máli eru spendýr algengust á matseðli þeirra, allt frá smáum nagdýrum upp í elgi. Stöku sinnum éta þau fugla eða jafnvel snigla þegar hart er í ári. Greining á fæðu fjallaljóna á tilteknum stað í Kaliforníuríki leiddi í ljós að 54% af veiði þeirra eru Múlhirtir (Odocoileus hemionus), virginíu-hjörtur (Odocoileus virginianus) var 28% af fæðunni, skógarkanínur (Sylviaticus spp.) voru 5,8%, Asnahéri (Lepus californicus) (sjá mynd)  2% og nautgripir 1,5%.

Hefðbundnar veiðiaðferðir fjallaljóna byggjast á því að læðast að bráðinni, stökkva á hana og bíta í háls eða hnakka, annað hvort til að kæfa hana eða spenna hálsliðina í sundur. Eftir að hafa étið nægju sína af nýdrepinni bráðinni fer fjallaljónið með afganginn á afvikinn stað og felur hann í laufblöðum eða einhverju öðru sem hægt er að nota til að hylja bráðina.

Púmur eiga sér ekki marga náttúrulega óvini. Stöku sinnum verða þau úlfum eða björnum að bráð, en þá er oftast um að ræða ung eða veik dýr.                                                                                                                                               Jón Már Halldórsson, líffræðingur.
Heimildir:
Currier, M.J.P. 1983. Mammalian Species. The American society of Mammalogists, Michigan. Nowak, R.M., Paradiso, J.L. 1983. Walker's Mammals of the World. The Johns Hopkins University Press.

- Ritstjórn.

Guðirnir gráta í dag

Veðrið er viðeigandi á þessum sorgardegi.  Í gærkvöldi gerðust þau voðaverk að Knattspyrnufélagið Puma laut í gras í 8-liða úrslitum Bikarkeppninnar.  Þrátt fyrir góðan seinni hálfleik, varð liðið að gjalda fyrir þann fyrri  sem var afar slakur af hálfu þeirra hvítklæddu. Eftir að hafa farið inn í leikhléið  tveimur mörkum  undir, var alltaf  á brattann að sækja fyrir Púmurnar.   Menn börðu sig þó saman í hálfleik og voru harðákveðnir í að spýta í hófana og snúa leiknum við, annað kom einfaldlega ekki til greina. 

Með never-say-die hugarfari tókst okkar mönnum að koma sér aftur inn í leikinn með góði marki frá Annel Helga.  Ekki leið á löngu þar til Vésteinn tók til sinna ráða og óð inn í vítateig andstæðinganna af harðfylgi og stóð af sér atlögur tveggja varnarmanna áður en hann laumaði tuðrunni í netið úr þröngu færi.  Staðan orðin jöfn og vindurinn allur í seglum Puma.  Þrátt fyrir viljann og nokkrar ágætis tilraunir tókst ekki að láta kné fylgja kviði.  Á þessum tímapunkti virtust liðsmenn Kumho vera brotnir og síst líklegir til að ógna marki Púmunnar. En allt kom fyrir ekki, Kumho komust upp hægri vænginn þegar 4 mínútur lifðu leiks, boltanum var rennt inn á miðjan völlinn tæpa 20 metra frá marki þar sem Kumho leikmaður stóð einn og óvaldaður. Hann hafði tíma til að leggja knöttinn fyrir sig og ná innanfótarspyrnu út við stöng , sem Þorleifur í markinu réð ekki við.  Lokatölur 3-2 Kumho í vil. Bikarævintýri Puma 2007 er lokið.

Geðshræring, vanlíðan og ógleði.   Kýldur-í-magann pakki !  


Liðið:  Leifi, Hreiðar, Viggi, Evert, Már Jr, Varði, Alex, Árni, Már Þ, Ívar, Veddi

Bekkur:  Viðar, Gunnar, Benni,  Annel, Þórhallur, Magnús, Gummi, Böðvar

Mörk Puma:     Annel, Vésteinn

Maður Leiksins:   Vésteinn Gauti Hauksson.  Fernan var aldrei reiðubúin að játa sig sigraða og lét vel í sér heyra allan leikinn, reif liðsfélaga sína með sér og hélt þeim á tánum.  Skoraði jöfnunarmarkið á viljanum og baráttunni sem var einkennandi í hans leik í gærkvöldi.  Hugarfarið skiptir máli.

- Ritstjórn.

Hreiðar uppvís að agabrotum !

Hreiðar Þór Jónsson, varnarmaður og aðstoðarþjálfari Puma, virðist hafa látið tilmæli Framkvæmdastjórnar um áfengisbann sem vind um eyru þjóta.  Margar ábendingar um svaðilfarir kappans í miðbæ Reykjavikur, benda til þessa að um hafi verið að ræða stórfellda misnotkun á áfengi og líkama. Ljóst þykir að Hreiðar hefur átt við þetta vandamál að stríða um langt skeið, en menn höfðu vonast til að þeir tímar væru nú að baki.  Svo virðist þó ekki vera og þessi reynslumikli leikmaður því uppvís að stórfelldum agabrotum.  Liðsfélagar Hreiðars hafa vissulega orðið fyrir gríðarlegum vonbrigðum með aðstoðarþjálfarann, sem jú ætti klárlega að vera öðrum fyrirmynd í þessum efnum. Það sem svíður meira við þessa hvimleiðu hegðun er að þetta skuli gerast í undanfara að mikilvægasta leik sumarsins hingað til.

Ekki er vitað hvernig Böðvar Jónsson hyggst taka á þessu máli. En eins og menn vita er samband þeirra félaga byggt á áralöngum vinskap. Menn spyrja sig því eðlilega; mun vina-pólitíkin verða agareglum félagsins sterkari ?   Ekkert hefur náðst til Böðvars og gerist sá orðrómur því æ háværari að framkvæmdastjórinn kunni að hafa verið með Hreiðari í för á öldurhúsum borgarinnar í nótt.  Ef satt reynist, að Böðvar hafi verið meðsekur og jafnvel stuðlað að hausleysi Hreiðars, er víst að Hermann Guðmundsson stjórnarformaður finnur sig knúinn til að grípa inn í og alls óvíst hvernig þær málalyktir yrðu.  Ef til þess kæmi að innan-félags dómstóll yrði settur í gang, er ljóst að kölluð verða til þau vitni sem hafa gefið sig fram í athugasemdum á síðunni.

UPDATE:
Borist hafa ábendingar um að fleiri leikmenn Puma kunni einnig hafa verið gegnsósa af áfengi í nótt.  Vitni herma að 2 lykilleikmenn liðsins hafi verið uppvísir að dólgslegri hegðun samfara óhóflegri áfengisneyslu í miðbæ höfuðborgarinnar nú undir morgun.  Ritstjórn hefur tekið þá ákvörðun af öryggisástæðum að birta ekki nöfn þeirra hér, heldur skora á þá málsaðila að gefa sig fram við framkvæmdastjóra eins og heiðursmönnum sæmir.

- Ritstjórn.

Puma - Kumho Rovers

Á morgun sunndag mæta liðsmenn Puma verðugum andstæðingum í 8-liða úrslitum Bikarkepnninnar. Kumho Rovers er lið sem hefur verið í deildinni á annan áratug, þó nafninu hafi verið breytt í Marshal tímabundið. Liðið hefur verið að styrkjast jafnt og þétt í gegnum árin undir stjórn Guðjóns Erlendssonar. Lærisveinar Guðjóns hafa hinsvegar ekki átt eins gott tímabil í ár og þeir kannski vonuðust eftir. Fyrsti leikur þeirra í B-riðli endaði til að mynda markalaus gegn Hómer, og í annarri umferð hlutu þeir 3-0 skell gegn Vatnsberum. Eftir það rífu þeir sig aðeins á lappir og sigruðu Kærustuna hans Ara sannfærandi 4-1, þar sem góðkunningi Púmunnar Óðinn Gunnarsson var á meðal markaskorara. Í næsta leik unnu þeir svo Nings með tveimur mörkum gegn engu og virtust vera komnir á gott ról. Tvö jafntefli litu hins vegar dagsins ljós í næstu umferðum, gegn Strumpum 3-3, og gegn Moppunni 2-2. Þegar hér er komið við sögu hefur Kumho Rovers hlotið 9 stig úr 5 viðureignum og ekki batnaði það í næsta leik. FC Fame kjöldrógu "dekkjastrákana" (orðskýring: Kumho dregur nafn sitt af S-Kóreskum dekkjaframleiðanda) 1-4, og draumurinn um sæti í úrslitakeppni nánast úti.

Í bikarkeppninni eru þeir eðlilega að gera gott mót og hafa lagt að velli tvö lið úr okkar riðli á leið sinni hingað í 8 liða úrslitin. Kumho lagði Geirfugla 4-2 í 1. umferð með 2 mörkum frá framherjanum skæða, Sigurði Árna Þórðarsyni og fyrrverandi Púman og áðurnefndur Óðinn Gunnarsson komst einnig á blað. Sigur þeirra í 2. umferð sýndi styrk liðsins, en þá öttu þeir kappi við Dufþak og títtnefndur Óðinn setti annað af tveimur mörkum gegn engu Duffanna.  Með þessum úrslitum má ætla að liðin séu áþekk í því tilliti að Puma sigraði einmitt Geirfugla með sömu markatölu og báru sigurorð af Dufþak með 2 mörkum gegn reyndar einu. Við skulum hinsvegar ekki gleyma okkur í slíkum samanburði því það er jú dagsformið sem ræður í Bikarnum.

Í öllum níu leikjum sínum samanlagt hefur liðið því sigrað 4, gert 3 rándýr jafntefli, og tapað 2. Markatalan er þeim rétt tæplega í hag eða 18 mörk skoruð gegn 15 mörkum andstæðinganna. Til samanburðar hefur Puma sigrað í 6 leikjum, gert 1 jafntefli og tapað 3 viðureignum, með markatöluna; 24 skoruð gegn 16 mörkum mótherja í 10 leikjum samanlagt. 

Framkvæmdastjórinn vill eindregið koma þeim tilmælum áleiðis til leikmanna; að ganga frekar varlega inn um gleðinnar dyr í kvöld, heldur en þunnir út úr bikarnum næsta dag.

Leikurinn fer fram á Ásvöllum í Hafnarfirði kl. 19:30 að staðartíma. Leikönnum (hér er beðist velvirðingar að þarna vantaði 'm' í orðið; leikmönnum) og starfsliði er gert að mæta ekki mikið síðar en 45 mínútum áður, eða kl. 18:45. 

BIKARINN HEIM !

- Ritstjórn.  

 

Engar færslur í dag ?

Kæru lesendur,
Það hryggir okkur að tilkynna að líklegast verða engar fréttir bornar á borð  í dag, föstudaginn 31. ágúst.  Nú eru 10 ár liðinn frá sviplegu andláti Lafði Díönu prinsessu af Wales.  Við skulum því syrgja í hljóði, um leið og við hugum að bikarleiknum á sunnudag við Kumho Rovers.   (preview væntanlegt)

Hvað veldur:
Ritstjórnarlegur ágreiningur auk anna í hliðarstörfum.

- Ritstjórn.

BETA spólan – 1. þáttur.

Sannir unnendur kvikmyndaperlna kannast eflaust flestir við cult-ræmuna The Pumaman frá árinu 1980. Myndin var gerð af ítölskum framleiðendum (þó með ensku tali) og heitir á frummálinu “L´uomo Puma”, var leikstýrð af Alberto De Martino sem einnig er handritshöfundur. Myndin skartar m.a. stjörnunni Donald Pleasence (Halloween 1-4, Prince of darkness, Great Escape o.fl.). Önnur hlutverk eru í höndum ítalskra smástirna á borð við Silvana Tranquilli og Guido Lollobrigida (bróðir Ginu).  

Hér að neðan má lesa brot úr umfjöllun á  IMDB (kvikmyndavefur) og Wikipedia (alfræðiorðabók):

 “Professor Tony Farms discovers that he is really Puma Man, a superhero who is descended from the gods. Together with an Aztec priest, they try to thwart the plans of Kobras, who is in possession of the sacred puma mask, and plans to hypnotize government leaders with it and take over the world. Puma Man spends most of the movie flying awkwardly and jumping around, leaving the Aztec priest to perform all the physically demanding tasks.”

“Several instances of particular note are the climactic fight where Pumaman spends most of the time jumping around while Vadinho punches out wave after wave of Kobras’s henchmen. Also particularly infamous are the flying scenes, which mostly consist of Pumaman madly waving his arms and legs as the obviously rear projected background advances. There is even a scene where Pumaman grabs a Kobra henchman, flies high into the sky and drops him, where, for some unknown reason, the background footage is at an angle, making the henchman look like he’s falling sideways.”

[beðið er velvirðingar á að þarna vantaði íslenskan texta við fréttina]  

Já það er greinilegt að hér er um að ræða mynd sem enginn sannur “Puma-maður” má láta framhjá sér fara. Óvíst er hinsvegar um tilvist myndarinnar hér á landi, en ef einhvers staðar, þá gæti hún leynst í hillum Laugarásvídeós eða jafnvel Aðalvídeóleigunnar. Einnig geta þeir sem það kjósa, að sjá myndina í hlutum á youtube. Góða Skemmtun.

Hér má sjá stutt myndbrot þar sem Puma-maðurinn uppgötvar að hann getur jú flogið:
>

Innan skamms er fyrirhugað að frumsýna á Íslenskum netmiðli,  níu mínútna stuttmyndina "Pumaman II" hér á Puma blogginu, hvar annars staðar.  Fenginn verður sjálfur Benedikt Nikulás Anes Ketilsson, sérlegur áhuga- og fræðimaður um stuttmyndir,  til að rýna í ræmuna og ausa úr brunni visku sinnar á tilteknum vettvangi  

- Ritstjórn.

Dómari verður fyrir líkamsárás!

Síðastliðið þriðjudagskvöld gerðist sá sorglegi atburður að gengið var í skrokk á dómara í leik Dinamo Gym80 og Vatnalilja.  Aðdragandinn að þessum glæp var með þeim hætti að markverði Dinamo var vikið af velli undir lok leiks. Eins og með allflesta leikmenn sem fá rauða spjaldið í þessari deild, var umræddur markvörður ekki sáttur við ákvörðun dómarans.  Hefst þá mikið reiðikast markvarðarins sem lýsir sér í því að hann rífur húfuna af dómaranum, fleygir í jörðina og fer að ausa alls kyns fúkyrðum og hótunum.  Eftir drykklanga stund yfirgefur drengurinn völlinn og leikar halda áfram.  Viðureignin endar svo þannig að Vatnaliljur sigra nokkuð örugglega, 4-1.  

Eftir að leikurinn er flautaður af, gengur hinsvegar títtnefndur markvörður rakleitt að dómara leiksins og dúndrar undan honum lappirnar þannig að hann fellur kylliflatur á bakið. Óstaðfestar fregnir herma að dómarinn hafi tafarlaust farið á slysadeild með beinbrot og bakverki. Þetta fráhvarf dómarans varð til þess að seinni leikurinn á Varmá þetta kvöld hefði átt að falla niður, en leikmenn Kærustunnar hans Ara og FC CCCP léku leikinn engu að síður og þau úrslit standa (8-1 fyrir Rússana)

Mikið hefur verið skrifað og skeggrætt um þetta atvik á umræðuvefi utandeildarinnar, þar sem menn lýsa réttilega furðu sinni og hneykslan á þessari hegðun.  Ekki er vitað að svo stöddu hvernig stjórnin, eða jafnvel Lögreglan mun taka á þessu máli.  Eðlilegt þykir að umræddur leikmaður sem þessu veldur hljóti langt bann, svo ekki sé minnst á þann möguleika að dómarinn kæri  líkamsárás til lögregluyfirvalda.

Þetta ku ekki vera í fyrsta skiptið sem nafn Dinamo Gym80 dregst inn í álíka umræðu. Hér fyrr í sumar eftir leik liðsins gegn Geirfuglum, ætlaði allt um koll að keyra. Rautt spjald fór á loft og viðhófust álíka hótanir um líkamsmeiðingar og tvívegis gerð tilraun til að hafa hendur á dómara leiksins. (skv. heimildum af umræðuvef) Ef til vill hefði stjórnin átt að gera refsivert fordæmi úr þessu, til þess einmitt að koma í veg fyrir að hótanir sem slíkar verði að veruleika, eins og raun bara vitni eftir leik Dinamo við Vatnaliljur.

Ljóst þykir að þessi  atburður verður ekki til þess að laða að dómara til starfa fyrir Utandeildina,  eða auka hróður hennar á nokkurn hátt.  Ritstjórn Puma sem og allir sem að liðinu komu fordæma þennan verknað með öllu.  

UPDATE:
Hér má sjá viðtal við Val Steingrímsson dómara í umfjöllun Fréttastofu Stöðvar 2 sem birt var nú í kvöldfréttum.

- Ritstjórn.

Stjórnarkrísa í deildinni

 Allt lítur út fyrir að mikil krísa sé á stjórnarmálum Utandeildarinnar þetta árið. Rugl hefur einkennt skipulag deildarinnar  í sumar og þá sérstaklega upp á síðkastið þar sem leikjum hefur verið frestað trekk í trekk og jafnvel þannig að lið hafi ekki verið látin vita, rétt eins og gerðist í gærkveldi þegar lið TLC og Hjörleifs átti að eiga sér stað. Á spjallvef deildarinnar kom eftirfarandi færsla fram: 

 “Bæði lið voru mætt fersk á Ásvelli til að spila leikinn þegar okkur er tilkynnt að leiknum sé frestað til morguns en gleymdist að láta liðin vita.....frábært. (Það var kvennaleikur i 1.deildinni í gangi á vellinum.)” 

Þetta er einungis eitt af fjölmörgum dæmum sem einkennt hefur stjórn deildarinnar í sumar. Eins og áhugamönnum um deildina hafa séð á heimasíðu hennar þá hefur ekki verið haldið utan um neina tölfræði þetta sumarið, rétt eins og í fyrra þar sem fagmannlega var staðið að flest öllum hlutum. Heimasíða deildarinnar í heild sinni er hálfgerður brandari, þar sem leikir eru seint skráðir inn og oftar en ekki hefur liðið allt upp í viku tími áður en úrslit leikja eru skráð inn. Uppsetning síðunnar er í lagi, umgjörðin góð, en uppfærslum er einfallega ábótavant. Þess má einnig geta að spjallborð síðunar einkennist af misfróðum  mönnum sem sletta fram rangfærslum, reiðilestri og orðbragði sem ekki á þar heima. Réttast væri ef umsjónarmenn síðunar færu annað slagið yfir það sem kemur þar fram og tækju einfaldlega út færslur sem settar eru þar inn. Gott dæmi um óvandaðar færslur eru þær fjölmörgu sem birtust í “stóra dómaramálinu”. Þá má einnig koma inn á að skipulagning leikja sumarsins hefur verið hálf einkennileg frá upphafi til enda þar sem einungis um 6 umferðir voru fyrirfram klára í upphafi tímabils og hálfgert rugl í framhaldi af því. 

Því er ljóst að krísa sé í málum stjórnar Utandeildarinnar. Framkvæmda- og Ritsjórn Puma hvetur stjórn deildarinnar að hysja upp um sig buxurnar og taka málin föstum tökum þær fáu vikur sem eftir eru að tímabilinu.  

 - Framkvæmdastjórn / Ritstjórn