Afmælisbarn dagsins

Afmælisbarn dagsins í dag 23. júní er Hreiðar Þór Jónsson. Hreiðar er fæddur á því herrans ári 1976. Hann er uppalinn í Kópavogi, þá fyrstu 12 árin í Vesturbæ.  Þar sótti hann Kársnesskóla og æfði af hörku bæði handbolta og fótbolta með stórveldinu Breiðabliki, en það má segja að vesturbæjardrengirnir félagarhans hafi haft mikil áhrif á kauða hvað íþróttaáhuga og ástundun varðar.

Á þrettánda ári flutti Hreiðar sig um set í Kópavogi og fór í Austurbæ. Það varð ekki til þess að hann hætti í knattspyrnunni þó að handboltaskórnir hafi verið lagðir á hilluna. Gerðu þó vinir hans í Vesturbænum ráð fyrir því að Hreiðar myndi hætta öllu sem tengist íþróttum því sögur voru á þeim tíma um að í Austurbæ Kópavogs væri einungis stunduð griiiiiim drykkja og hórlífi. Eins og Hreiðar segir sjálfur, "Já þeir voru smeykir strákarnir, enda datt ég oft í það á þessu tímabili og var í tómu rugli, en ég hélt þó áfram í fótboltanum".

Þó svo að Hreiðar hafi flust til þá kláraði hann grunnskólanám í Hjallaskóla með sóma og fór í beinu framhaldi í Menntaskólann í Kópavogi. Jafnhliða námi hélt drengurinn sig ávallt við knattspyrnuiðkun og það með Breiðablik, liðinu sem hann hafði hafði æfingar með í upphafi. En það kom sá tími að Blikar gátu ekki kauða. Þá flutti hann sig til Austurbæjarliðsins, liðsins sem oft hefur verið nefnt sem litla liðið í Kópavogi, HK. Þar lék Hreiðar í nokkur tímabil, með fleiri góðum drengjum eins og Árna Þór Eyþórssyni hinum fótbrotna.

Þegar Hreiðar hafði fengið nóg af HK og kó þá var honum boðinn samningur hjá Puma. Strákurinn sló strax til enda ekki úr miklu að moða fyrir kauða. Hreiðar er einn af leikjahæstu mönnum liðsins í dag, en hann hefur spilað fyrir liðið síðan 1998, eða í 10 ár nú í sumar.

Hreiðar verður að heiman á afmælisdaginn og því er ekki gert ráð fyrir Hreiðari í leikinn í kvöld þegar Puma tekur á móti Strumpum í Fagralundi í Kópavogi.

Rit- og framkvæmdarstjórn Puma óskar Hreiðari til hamingju með daginn og vonar að hann hafi það gott í fríinu, en hann verður erlendis næstu tvær vikurnar.

 - Ritstjórn

Fagrilundur

Ritstjórn hefur verið beðin að koma eftirfarandi tilkynningu á framfæri:

Puma mætir Strumpum á morgun mánudag 23. júní klukkan 21:00 í Fagralundi í Fossvogi. Framkvæmdarstjórn hvetur leikmenn til þess að mæta og melda sig inn eða út eftir því sem á við.

 - Ritstjórn

Handball Manager 08/09

Með pensilinn í annarri og Goldfinger-Gullið í hinni, hefur Aleksandr Arnarovich formaður Handknattleiksdeildar HK farið hamförum á leikmannamarkaðnum í sumar. Handknattleiksfélag Kópavogs eru svo aldeilis að standa undir nafni þessa dagana og ætla sér gríðarlega hluti á komandi vetri. Félagið hefur lokkað til sín fjölmarga frambærilega leikmenn í endurreisnar-stjórnartíð Arnarovich.

Á meðfylgjandi mynd má sjá Aleksandr með þeim Sverre Jakobsson og Jón Björgvin Pétursson sem hafa gengið formlega frá samningum við úrvalsdeildarlið HK en þeir sömdu báðir til tveggja ára. Sverre kemur heim frá Þýskalandi þar sem hann lék með Gummersbach en hann spilaði með HK fyrir nokkrum árum. Jón Björgvin kemur frá Fram þar sem hann hefur leikið alla tíð.

HK hefur einnig fengið til sín markvörðinn Sveinbjörn Pétursson frá Akureyri (fyrrverandi leikmann Puma) og þá er nánast frágengið að Valdimar Þórsson snýr aftur til Kópavogsliðsins eftir dvöl í Svíþjóð þar sem hann spilaði með IFK Malmö.

Þettta eru sannarlega gleiðfregnir fyrir HK-inga og greinilegt að Aleksandr Arnarovich stýrir deildinni með miklum sóma og óbilandi metnaði. Við vonum eindregið að Alex fari nú að sýna eitthvað svipað af sér þegar hann reimar á sig takkaskóna í sumar. Ónefndur leikmaður Puma lét hafa eftir sér í kjölfar þessarar fréttar, þegar leitað var skoðunar á málinu:
"Alli, hættu að leika þér í manager og kodd´ í fótbolta drengur, hvað er málið? það væri annað ef þú nenntir að æfa eins vel og þú nennir að tuða í símann. Hvað er það næst ...á kannski að liggja í veiði hálft tímabilið líka ha?"
Leikmaðurinn vildi ekki láta nafn síns getið af ótta við óútreiknanlegt skap varnar/miðjumannsins ógurlega (Alexander)

Við óskum Alexanderi og HK-ingum til lukku með þessa nýju liðsmenn og Ritstjórn Puma tippar á að handbolta titlarnir séu klárlega á leið í austurbæ Kópavogs 2009.  

- Ritstjórn

Sverre og Jón skrifuðu undir hjá HK

2. umferð bikars

Þá hefur verið dregið í aðra umferð bikarkeppninnar. Puma drógst á móti TLC/Kórdrengjum. Leikur TLC og Kórdrengja var frestað þegar leikið var í fyrstu umferð, en ekki er vitað hvenær sá leikur kemur til með að fara fram. Eitt er þó nokkuð ljóst að hann verður spilaður áður en Puma mætir öðru hvoru liðinu. Hvenær það verður, verður tilkynnt seinna í vikunni að sögn stjórnarmanna deildarinnar.

Eftirfarandi er drátturinn:

Puma - TLC/Kórdrengir
Vatnalilijur - Metro
Hjörleifur - Duffi
Nings - FC CCP
FC ICE - Melsted
K.H.Ara - V.Júpeters
Áreytni - Kumho
FC Keppnis - Strumpar

 - Ritstjórn

Strumpar

Strumparnir, sem áður voru kallaðir skríplarnir, eru bláar og hvítar skáldsagnarverur sem búa í skógi einhversstaðar í Evrópu. Upprunalega voru Strumparnir teiknaðir af belgíska teiknaranum Peyo, en það var bandaríski framleiðandinn Hanna-Barbera sem gerði seinni mjög svo vinsæla sjónvarpsþætti, sem Laddi talsetti svo á íslensku.

Í ár eru fimmtíu ár frá því að þessar litlu bláu og hvítu persónur litu dagsins ljós, en á þessum fimmtíu árum hafa þær glatt börn um allan heim. Helsti óvinur Strumpana þessi 50 ár hefur verið galdrakallinn Kjartan og illgjarni kötturinn hans, en þeir kumpánar hafa verið á höttunum eftir Strumpunum allt frá upphafi.

Í raunveruleikanum eru hins vegar óvinirnir Strumpa aðrir en Kjartan og kötturinn. Strumparnir leika í dag í Utandeildinni í knattspyrnu og ljóst er að lið sem leika í A-riðli þessarar ágætu deildar hafa ekki hug á því að vingast við þessa kauða.

Strumpar hafa leikið þrjá leiki sem af er sumri, tvo í deild og einn í bikar. Strumpar byrjuðu á því að tapa á móti Kumho, 0-4. Næsti leikur var við Elliða í bikar. Þann leik sigruðu litlu bláhvítu verurnar 3-0. Aftur mættust svo Strumpar og Elliði í deild nú á sunnudag, en þar fóru Strumpar með sigur, 4-2.

Puma leikur við Strumpa mánudaginn næstkomandi, þann 23. júní. Leikurinn hefst klukkan 21:00 og fer fram á heimavelli Puma, í Fagralundi Fossvogsdal.

 - Ritstjórn

Kæru félagar

Ritstjórn Knattspyrnufélagsins Puma vill nota tækifærið og óska öllum lesendum, leikmönnum, stuðningsmönnum, sem og Íslendingum nær og fjær hjartanlega til hamingju með þjóðhátíðardaginn 17. júní. Hvetjum leikmenn sérstaklega til að sleppa sér algjörlega í candy-flossinu og kampavíninu í dag, því ljóst þykir að æfingin sem átti að vera í kveld, fellur niður. Framkvæmdastjórn hefur látið að kröfum um mætingu, vegna þjóðhátíðar annars vegar og stórleiks Frakka og Ítala á Evrópumótinu í knattspyrnu í kvöld hinsvegar.
En snúum okkur að afmælisbarninu, vorri þjóð og fósturjörð;

Lýðveldið Ísland er eyríki á Norður-Atlantshafi á milli Grænlands, Færeyja og Noregs. Ísland er um 103.000 km² að stærð; það er önnur stærsta eyja í Evrópu og sú átjánda stærsta í heimi. Á Íslandi búa um það bil 313.000 manns. Höfuðborg landsins er Reykjavík.

Landnámabók segir frá hvernig landnám Íslands hófst kringum árið 874 þegar Ingólfur Arnarson nam hér land, þó aðrir höfðu áður dvalið tímabundið á landinu. Á næstu áratugum og öldum flutti fjöldi fólks til Íslands á tímabili sem nefnt er landnámsöld. Ísland komst með Gamla sáttmála undir vald Noregs árið 1262 og var undir stjórn Norðmanna og Dana til ársins 1918, þegar það hlaut fullveldi. Danska ríkið fór þó með utanríkismál og landhelgisgæslu fyrir hönd Íslands og löndin höfðu sameiginlegan konung þar til lýðveldi var stofnað á Íslandi 1944. Landið hefur gengið undir ýmsum nöfnum, einkum meðal ljóðskálda.Á síðari hluta 20. aldar jókst þjóðarframleiðsla Íslendinga til muna og innviðir og velferðarkerfi landsins efldust. Nú er Ísland þróaðasta land heims, samkvæmt vísitölu SÞ um þróun lífsgæða. Ísland er meðlimur í SÞ, NATO, EFTA og EES.

Til hamingju Ísland.

- Ritstjórn

Árni fótbrotinn !

Puma varð fyrir miklum skakkaföllum í leik liðsins gegn Geirfuglum í gær.  Það var ekki nóg með að Ívar Guðmundsson hafði farið út af meiddur eftir 20 mínútna leik, og Púmurnar þar með orðnar 12, heldur átti ástandið eftir að versna í byrjun seinni hálfleiks.  Árni Þór Eyþórsson miðjumaðurinn skæði og fyrrverandi leikmaður KR og HK, braust  þá fram að miklu harðfylgi og náði skoti á mark andstæðinganna.  Ekki vildi betur til en leikmaður Geirfugla keyrir inn í hann eftir skotið með þeim afleiðingum að ökklinn gaf sig.   

„Jú það er rétt,  hann er brotinn (ökklinn) og liðbandið slitið. Ég þarf að vera 6 vikur í gifsi, þetta er hræðilegt.  Maður er þá bara kominn í sumarfríið hvort sem manni líkar betur eða verr.  Þetta var náttúrulega alveg fáránlegt hjá  kauða (Geirfuglinn) að fara svona í mig í skotinu, þar sem maður er í slæmu jafnvægi á annarri löppinni. En svona er þetta bara, maður verður að bíta í hið fornfræga súra epli.  Þar sem maður er nú ekki fullur atvinnumaður í boltanum, þá kemur þetta niður á dagvinnunni.  Maður má ekki missa mikið úr vinnu þegar maður er með konu og 3 börn á kantinum.  Alls ekki á það bætandi miðað við efnahagsástandið núna, þessi helv#$%  sjálfstæðisflokkur er búinn að klúðra þessu gjörsamlega ..“     Sagði Árni Þór í símaviðtali við ritstjórnarfulltrúa nú rétt í þessu.

Að sjálfsögðu óskum við þess innilega að Árni nái sér fljótt og að fullu.  Ljóst er að mikið skarð er hoggið í raðir Puma með þessu áfalli.  Árni hefur verið fastur byrjunarliðsmaður í fjölda ára og verður mikill missir fyrir félagið í komandi átökum. 

-          Ritstjórn  

Sorgarsunnudagur

Það var hugur í Pumum þegar þær mættu sprækar til leiks í gærkvöldi í Elliðárdalnum. Leikur dagsins var Puma gegn Geirfuglum og voru bæði lið staðráðin í því að ná hagstæðum úrslitum.

Leikurinn fór líflega af stað og strax á 5 mínútu áttu Geirfuglar gott færi þar sem einn af sóknarmönnum liðsins mætti Böðvari Jónssyni markverði Puma einn á einn en Böðvar náði að verja vel. Það voru hins vegar leikmenn Puma sem opnuðu markareikning leiksins með því að skora fyrsta markið. Þar var á ferðinni Þorvarður Björgúlfsson sem fylgdi vel á eftir skoti sem Guðlaugur Rafnsson hafði átt í stöngina eftir glæsilegan einleik, 1-0. Bæði lið sóttu stíft í framhaldi af þessu marki en það voru Geirfuglar sem áttu næsta mark. Þrumuskot á nærstöng þar sem markvörður kom ekki vörnum við, 1-1. Við þetta kom fítonskraftur í lið Puma, sem þó missti helsta sóknarmann, Ívar Guðmundsson, sinn af velli þegar hann missteig sig illa. Liðið átti réttilega að fá dæmda vítaspyrnu þegar Guðlaugur var hreinsaður niður í vítateig Geirfugla en á óútskýranlegan hátt dæmdi einkennilegur dómari leiksins ekki neitt, sem kom leikmönnum Puma, Geirfulga og áhorfendum mjög á óvart. Guðlaugur kom Puma yfir þegar stutt var eftir af fyrrihálfleik eftir mikla baráttu í markteig Geirfulga, 2-1.

Seinnihálfleikur fór ekki vel af stað fyrir leikmenn Puma. Geirfuglar sóttu grimmt og áttu nokkur mjög góð færi. Í framhaldi fór vængmaður/framherji Puma slasaður af velli, en komið er í ljós að drengurinn er fótbrotinn. Nú voru leikmenn Puma aðeins 11, þar sem tveir leikmenn voru farnir slasaðir af velli. Við þetta róaðist mikið á leik Puma og Geirfuglar sóttu í sig veðrið. Þegar um 15 mínútur voru liðnar af hálfleiknum fengu Geirfuglar dæmda vítaspyrnu. Steig leikmaður #10 hjá Geirfuglum á punktinn og tók skotið. Böðvar markmaður Puma gerði sér lítið fyrir og varði glæsilega, það vel að hann greip knöttinn í hægra horninu, staðan en 2-1. Geirfuglar héldu hins vegar áfram sinni pressu á vænglausu liði Puma. Geirfuglar jöfnuðu þegar um 20 mínútur voru liðnar af hálfleiknum, staðan 2-2. Pumur héldu sínu áfram, þreyttir og skipulagslausir. Geirfuglar nýttu sér bágt ástand liðsins og þegar um 10 mínútur voru eftir af leiknum náðu þeir að komast yfir, eftir mikla pressu, 3-2. Urðu þetta lokatölur leiksins.

Það sem einkenndi þennan leik var gríðarlega einkennileg dómgæsla, þar sem meðal annars leikmaður #9 hjá Geirfuglum hefði með réttu átt að fara út af með tvö gul spjöld, en dómari leiksins hafði ekki skráð niður hjá sér samviskusamlega hverjir voru komnir með spjöld og því hékk sá maður inná.

Maður leiksins að mati ritstjórnar, Böðvar Jónsson markvörður Puma sem oft varði glæsilega, meðal annars vítaspyrnu eins og áður hefur komið fram.

Byrjunarlið:

           Ívar   Guðlaugur
Árni    Benni    Arnar    Varði
Maggi   Viggi    Alex     Hreiðar
                 Böðvar

Bekkur:
Viðar, Gunnar

Sunday Night Football

Á sunnudag tekur Puma á móti Geirfuglum (sjá mynd; fengin af heimasíðu Geirfugla) í þriðju umferð deildarinnar. Af því tilefni hefur ritstjórn ákveðið að endurbirta hluta úr grein sem birtist hér á síðunni síðastliðið sumar þegar Puma mætti Geirfuglum. Pumur sigruðu leikinn með fjórum mörkum gegn engu, þar sem Vésteinn Gauti Hauksson skoraði öll mörk leiksins.

"Leikurinn fór vel af stað og leikur Puma einkenndist af góðu spili. Þó komu upp leiðindi á 14 mínútu leiksins þegar Benni þurfti að berja frá sér, og næla sér í gult spjald, þar sem Geirfuglar slógu frá sér í átt Puma eins og dýr í útrýmingarhættu. Puma uppskar hins vegar á 25 mínútu þegar Vésteinn skoraði fyrsta mark leiksins. Hann bætti svo öðru við á 33 mínútu úr víti eftir að brotið hafði verið á honum. Ágúst Ingi fékk áminningu þremur mínútum síðar fyrir að brjóta á leikmanni Geirfugla. Geirfuglar minnkuðu muninn á 40 mínútu og var staðan 2-1 í hálfleik.

Seinni hálfleikur fór ekki eins vel af stað og sá fyrri. Geirfuglar jöfnuðu metin og var staðan 2-2 þangað til á 72 mínútu þegar enginn annar en Vésteinn skoraði sitt þriðja mark í leiknum og kom Puma yfir á nýjan leik. Geirfuglar sóttu stíft, en Puma sýndi góðan karakter og bætti við marki á 77 mínútu leiksins. Hver annar en Vésteinn! Jú, fjögur mörk voru staðreynd og tryggði hann Puma glæsilegan sigur. Á 79 mínútu fékk Annel svo að líta gula spjaldið.

Sigur var staðreynd og vonandi er þetta það sem koma skal í sumar. Það sýndi sig og sannaði hvuzzu mikilvægt var að hafa stóran hóp í þessum leik og megi það vera sem oftast."

Ritstjórn vonar að Puma komi til með að endurtaka leikinn á sunndag. Ekki er þó gert ráð fyrir markaskoraranum Vésteinni í leikinn þar sem kauði hefur verið að leika tveimur skjöldum á þessu tímabili, eins og fram kom á vefnum í gær.

Leikurinn hefst klukkan 19:30 á Fylkisvelli í Árbænum. Ritstjórn hefur verið beðin um að koma því á framfæri til leikmanna að mæting er klukkan 18:40.

 - Ritstjórn

Enginn veit hvað átt hefur fyrr en misst hefur

Þessi fleygu og fornu spakmæli eiga svo sannarlega við „fyrrverandi?“ framherja  Puma, Véstein Gauta Hauksson.  Eins og fylgismenn Púmunnar vita  þá ofmetnaðist Fernan gríðarlega eftir  sæmilegasta mót í fyrra þar sem umræddur hreppti Gullskóinn sem markahæsti maður tímabilsins.  Vésteinn  fékk þá flugu í hausinn sinn hárlausa, að nú skyldi færa sig á hærri „level“, nánar tiltekið í 3. deild Íslandsmótsins í knattspyrnu  hvorki meira né minna. 

Fernan tilkynnti framkvæmdastjóra Puma á vordögum að hann hygðist gang til liðs við Knattspyrnufélag Rangárvallasýslu(KFR). Að sjálfsögðu varð framkvæmdastjórinn sleginn yfir þessum fregnum og í raun virkilega sár út í framherjann vegna þessa, sem átti jú ár eftir af samningi sínum við Puma. „Ég skil hann Véstein ekki, ég veit ekki hvað honum  gengur til drengnum. Ef hann heldur að spila með Hvolsvelli í 4. Deild sé stórt skref upp á við, þá skjátlast honum skelfilega.  Ég veit ekki betur en við höfum látið allt eftir honum hér í Púmunni og látið með hann eins og prinsessuna sem hann er. En svona eru þessir unglingar í dag, það er engin hollusta, engin tryggð, ekkert stolt og enginn kærleikur gagnvart samstarfsmönnum sínum, það er bara ég ég ég um mig frá mér til mín.“

En Adam var ekki lengi í paradís. Ferill Fernunnar með KFRfór ekki vel af stað.  Kappinn meiddist illa á hné fyrr í vor og hefur lítið getað beitt sér með sínu nýja liði í botnbaráttu neðstu deildar.  KFR hefur leikið 3 leiki í 3. deild og tapað þeim öllum. Vésteinn hefur ekki verið í hóp liðsins hingað til. 

Nú er svo komið að Vésteinn virðist vera að sjá að sér. Hann hefur verið utan í framkvæmdastjóranum eins og grár köttur og grátbeðið um að vera gefið annað tækifæri. Það má því segja að Vésteinn geri sér nú loksins grein fyrir því dýrmæta sem hann átti,  eftir að hann missti það. „Ég lét persónulega metorðagirnd leiða mig í gönur, og ég stór sé eftir því núna. En maður lifir og lærir, það er ekkert öðruvísi.  Reikna nú samt með að stíga þetta skref fyrr eða síðar, þ.e.a.s. upp í 4. deildar boltann, en það verður greinilega ekkert hlaupið að því úr þessu.“   Sagði Fernan grátbólginn og kjökrandi eftir sparkvallarbolta við Þinghólsskóla í vesturbæ Kópavogs á mánudagskvöld.

 - Ritstjórn