Puma - Kumho Rovers

Á morgun sunndag mæta liðsmenn Puma verðugum andstæðingum í 8-liða úrslitum Bikarkepnninnar. Kumho Rovers er lið sem hefur verið í deildinni á annan áratug, þó nafninu hafi verið breytt í Marshal tímabundið. Liðið hefur verið að styrkjast jafnt og þétt í gegnum árin undir stjórn Guðjóns Erlendssonar. Lærisveinar Guðjóns hafa hinsvegar ekki átt eins gott tímabil í ár og þeir kannski vonuðust eftir. Fyrsti leikur þeirra í B-riðli endaði til að mynda markalaus gegn Hómer, og í annarri umferð hlutu þeir 3-0 skell gegn Vatnsberum. Eftir það rífu þeir sig aðeins á lappir og sigruðu Kærustuna hans Ara sannfærandi 4-1, þar sem góðkunningi Púmunnar Óðinn Gunnarsson var á meðal markaskorara. Í næsta leik unnu þeir svo Nings með tveimur mörkum gegn engu og virtust vera komnir á gott ról. Tvö jafntefli litu hins vegar dagsins ljós í næstu umferðum, gegn Strumpum 3-3, og gegn Moppunni 2-2. Þegar hér er komið við sögu hefur Kumho Rovers hlotið 9 stig úr 5 viðureignum og ekki batnaði það í næsta leik. FC Fame kjöldrógu "dekkjastrákana" (orðskýring: Kumho dregur nafn sitt af S-Kóreskum dekkjaframleiðanda) 1-4, og draumurinn um sæti í úrslitakeppni nánast úti.

Í bikarkeppninni eru þeir eðlilega að gera gott mót og hafa lagt að velli tvö lið úr okkar riðli á leið sinni hingað í 8 liða úrslitin. Kumho lagði Geirfugla 4-2 í 1. umferð með 2 mörkum frá framherjanum skæða, Sigurði Árna Þórðarsyni og fyrrverandi Púman og áðurnefndur Óðinn Gunnarsson komst einnig á blað. Sigur þeirra í 2. umferð sýndi styrk liðsins, en þá öttu þeir kappi við Dufþak og títtnefndur Óðinn setti annað af tveimur mörkum gegn engu Duffanna.  Með þessum úrslitum má ætla að liðin séu áþekk í því tilliti að Puma sigraði einmitt Geirfugla með sömu markatölu og báru sigurorð af Dufþak með 2 mörkum gegn reyndar einu. Við skulum hinsvegar ekki gleyma okkur í slíkum samanburði því það er jú dagsformið sem ræður í Bikarnum.

Í öllum níu leikjum sínum samanlagt hefur liðið því sigrað 4, gert 3 rándýr jafntefli, og tapað 2. Markatalan er þeim rétt tæplega í hag eða 18 mörk skoruð gegn 15 mörkum andstæðinganna. Til samanburðar hefur Puma sigrað í 6 leikjum, gert 1 jafntefli og tapað 3 viðureignum, með markatöluna; 24 skoruð gegn 16 mörkum mótherja í 10 leikjum samanlagt. 

Framkvæmdastjórinn vill eindregið koma þeim tilmælum áleiðis til leikmanna; að ganga frekar varlega inn um gleðinnar dyr í kvöld, heldur en þunnir út úr bikarnum næsta dag.

Leikurinn fer fram á Ásvöllum í Hafnarfirði kl. 19:30 að staðartíma. Leikönnum (hér er beðist velvirðingar að þarna vantaði 'm' í orðið; leikmönnum) og starfsliði er gert að mæta ekki mikið síðar en 45 mínútum áður, eða kl. 18:45. 

BIKARINN HEIM !

- Ritstjórn.  

 

Athugasemdir

[Alex (IP-tala skráð) 1.9.2007 kl. 20:09]

mættur

[VIP (IP-tala skráð) 1.9.2007 kl. 20:18]

Ég pant vera vítaskytta  ..SHOTGUN !   

Annars er ég mættur, og Alli er ekkert hérna sko! 

[gaui (IP-tala skráð) 2.9.2007 kl. 02:06]

Verður gaman að hitta ykkur á vellinum... Allir að mæta með góða skapið

[Vési (IP-tala skráð) 2.9.2007 kl. 02:14]

Mæti eldhress

[annel (IP-tala skráð) 2.9.2007 kl. 12:19]

annel mætir superhress...... fretti sammt að ungur maður að nafni hreiðar hefði verið hauslaus i gær þratt fyrir góðan pistil ritstjornar...... hahahaha hvar er fyrirmyndin fyrir okkur ungu strakana ???? koma svo puma tökum þetta....

[Gosi (IP-tala skráð) 2.9.2007 kl. 12:53]

Sælir piltar, vona að leikurinn verði góður og allir geymi tuðið heima. Varðandi Hreiðar þá hitti ég hann á barnum í gær , en var hálf edrú sjálfur, og lagði bæði mikla fjármuni og orku við að halda honum vel blautum fram eftir morgni sem gekk mjög vel.Vona að hann hafi nú samt skilað sér heim.Sé ykkur á eftir.

 p.s. Böddi þú mannst að koma með 2 kippur og sigurliðið endar með kassa.

ást og virðing

Gosi