Puma

28.8.2007 | 13:54

Múgur & margmenni

Athygli vakti í leik Puma við Asíu í gær, hvursu gríðarlega þétt setinn bekkurinn var hjá heimamönnum. Slegið var aðsóknarmet í mætingu leikmanna, alls 24 talsins, og eðlilega erfitt að halda utan um skiptingar. Þröngt máttu sáttir sitja á bekknum, og heyrðust iðulega harmakvein þeirra sem hvíldu þar sem þeir biðluðu til spilandi leikmanna um að koma af velli. Það var mál margra að svona gætu leikirnir ekki farið fram með góðu móti. Hugmyndir um að skikka hópinn við 18 leikmenn skutu m.a. upp kollinum. Reglur því samfara gætu verið á þá leið að meldingar + mæting á æfingar og leiki, ráði því hverjir ná í hópinn. Þetta vandamál er sem betur fer sjaldgæft og frekar undantekning en regla að fleiri en 18 láti sjá sig. En nú fara í hönd mikilvægir leikir á borð við 8-liða úrslit í bikar. Ef hagstæð úrslit eiga að nást er ljóst að mæting uppá 20+ gerir liðinu erfitt fyrir, ef allir gera þá kröfu að fá sínar mínútur.

Þetta er í raun “gott” vandamál að hafa á þessum vettvangi. Flestir kannast við það í gegnum árin að mætingin hefur stundum hljóðað uppá 10-13 leikmenn, sem er öllu leiðinlegri uppákoma. Öllu má þó ofgera að margra mati, og vonandi náum við að sigla hinn gullna meðalveg í komandi leikjum. Taka skal fram að hér er um að ræða hugrenningar frá leikmönnum sjálfum sem komu uppá yfirborðið í og eftir leik gærkvöldsins. Það er svo spurning hvort framkvæmdastjórn taki þær til greina.

- Ritstjórn.