Puma

Framkvæmdarstjórn vill minna á æfingu í kvöld klukkan 20:00 á svæði HK í Fagralundi í Fossvogi. Allir hvattir til að mæta.

Í leik Puma og Strumpa á mánudag gerðist leiðindaratvik þar sem Magnús Lárusson handarbrotnaði. Magnús er atvinnukylfingur sem hefur spilað vel undanfarin ár. Eftirfarandi er frétt eftir Sigurð Elvar Þórólfsson sem birtist á vefsíðu Morgunblaðsins mbl.is í vikunni.


„Það er ljóst að keppnistímabilið hjá mér hér á Íslandi er búið en ég veit ekki hvort ég verð klár í slaginn fyrir úrtökumótið fyrir Evrópumótaröðina í haust. Það er eiginlega allt á öðrum endanum en ég mun fá álit frá sérfræðingum á  næstu dögum hvað best er að gera,“ sagði atvinnukylfingurinn Magnús Lárusson úr Kili en hann braut bátsbeinið í úlnlið í knattspyrnuleik með utandeildarliðinu FC Puma.

„Það er alveg hægt að segja að það hafi verið röng ákvörðun hjá mér að spila leikinn. Þetta var fyrsti leikur minn með liðinu á þessu tímabili en ég hef verið að leika mér í fótbolta í gegnum tíðina,“ sagði Magnús. Atvikið átti sér stað á mánudagskvöldið, degi eftir að hann endaði í öðru sæti á þriðja móti ársins á Kaupþingsmótaröðinni á Garðavelli á Akranesi. Þar tapaði Magnús í bráðabana gegn Þórði Rafni Gissurarsyni úr GR.

„Ég verð örugglega í 6-8 vikur í gifsi og kannski þarf ég að fara í aðgerð. Ég geri alveg ráð fyrir því að vera úr leik út þetta ár. Ef allt fer á versta veg gæti það verið niðurstaðan. Ég mun ekki ekki leika fleiri leiki með FC Puma, aldrei. Ég var í sókninni og sólaði varnarmann en við flæktumst eitthvað saman og hann datt síðan á höndina á mér. Ég fann að það var eitthvað mikið að og þegar ég kom á slysamóttökuna áttaði ég mig á því að ég hafði aldrei komið þangað áður. Ég hef varla fengið gat á hausinn í gegnum tíðina og þetta er því alveg nýtt fyrir mér að meiðast. Ég hefði alveg eins getað dottið í Kringlunni og meitt mig. Slysin gera ekki boð á undan sér og það er auðvelt að vera vitur á eftir á,“ sagði Magnús.  


Ritstjórn Puma óskar Magnúsi velfarnaðar og bata.

 - Ritstjórn

	Tímabilið á enda hjá Magnúsi
Ábyrgðarmaður færslu Tilkynna um óviðeigandi tengingu við frétt

Í viku liðinni lék 3. deildarlið KB við  úrvalsdeilarlið KR í Bikarkeppni KSÍ.  Knattspyrnufélag Breiðholts (KB)  sem að miklu leiti er B-lið  1. deildarliðs Leiknis úr sama hverfi, stóðu sig framar öllum vonum þó tap sé aldrei æskileg úrslit í knattspyrnuleik.   Stórveldið KR var nánast fullskipað sínum sterkustu mönnum, en tókst þó einungis að innbyrða sigur með minnsta mögulega mun, eða 1-0.  Það var markamaskínan Björgólfur Takefusa sem skoraði markið snemma í seinni hálfleik.

En hvað kemur okkur það við?  Jú.  Fyrrum liðsmaður Púmunnar  Annel Helgi Finnbogason sem hlaut útnefninguna „efnilegasti leikmaður/bjartasta von“  Puma 2007, var í leikmannahópi  Breiðholtsliðsins. En því miður fyrir okkar mann  sá þjálfarinn sér ekki fært að leyfa Annel að upplifa drauminn. KB gerðu hinsvegar 3 skiptingar en Annel var ekki á meðal þeirra.

KB hafði á leið sinni í Frostaskjólið lagt  Véstein og félaga í KFR 2-4, og unnin frækin sigur á 1. deildarlið Njarðvíkur á útivelli 0-2.  Hinsvegar kom Hvorki Annel né Vésteinn við sögu í þessum leikjum.  KB hefur samt sem áður gengið brösulega í deildarkeppninni og eru í 4. Sæti í C-riðli, hafa unnið einn leik, gert eitt jafntefli og tapað þremur leikjum. 

Annel virðist þó vera að fá náð fyrir augum þjálfarans því kappinn var í byrjunarliði KB í síðasta leik gegn Skallagrími í Borgarnesi á mánudagskvöld.  En þrátt fyrir fullar 90 mínútur og prýðilega frammistöðu okkar manns, sigruðu heimamenn með þremur mörkum gegn engu.  Við óskum Annel góðs gengis í sumar og munum fylgjast með framgöngu hans 3. deildinni. 

Á meðfylgjandi mynd sem fengin er af fotbolti.net má sjá Annel (fyrir miðju) ganga af velli í Frostaskjólinu síðastliðið fimmtudagskvöld.  

- Ritstjórn

Vésteinn Gauti Hauksson fyrrum framherji Puma er byrjaður að láta að sér kveða í  3. deild íslandsmótsins í knattspyrnu.  Fernan hefur þó ekki verið iðinn við markaskorun eins og við þekkjum hann. Kempan hefur verið  að verma bekkinn hjá KFR undanfarna 3 leiki , hefur komið inná í þeim öllum og er mínútunum alltaf að fjölga.  Þrátt fyrir það hafa Vésteinn og félagar ekki náð í eitt einasta stig í þeim 5 leikjum sem búnir eru. Félagið situr því eðlilega á botninum í A-riðli með núll stig og markatöluna 3-14.  

Batnandi mönnum er víst best að lifa, og erum við þess handvissir að Fernan sættir sig engan veginn við árangur sinna manna það sem af er móti.  Við bendum Vésteini vinsamlega á það að félagskiptaglugginn fer að opna og er hann ávallt velkominn „heim“  í Fagralundinn.  Í það minnsta ábyrgjumst við að bensín kostnaður kappans mun lækka gríðarlega, sem og sjálfstraustið aukast til muna.  Áhorfandi á leik Strumpa og Púmunnar í gærkvöldi lét þessi eftirminnilegu orð falla um fjarveru Fernunnar:
„Puma án Vedda er svona svipað og hafa samfarir með smokk, það eru c.a. 1% líkur að þið skorið, en þið fáið allavega ekki sýfilis eða 18 ára víxil á meðan“   
 
Ekki treystir undirrituð sér til að túlka þessi orð nánar, geri það bara hver fyrir sig.  Á meðfylgjandi mynd má sjá KFS úr eyjum fagna sigri, en þeir höfðu betur gegn Vésteini og félögum í gærkvöldi; 1-3.

-          Ritstjórn

Afmælisbarn dagsins í dag 23. júní er Hreiðar Þór Jónsson. Hreiðar er fæddur á því herrans ári 1976. Hann er uppalinn í Kópavogi, þá fyrstu 12 árin í Vesturbæ.  Þar sótti hann Kársnesskóla og æfði af hörku bæði handbolta og fótbolta með stórveldinu Breiðabliki, en það má segja að vesturbæjardrengirnir félagarhans hafi haft mikil áhrif á kauða hvað íþróttaáhuga og ástundun varðar.

Á þrettánda ári flutti Hreiðar sig um set í Kópavogi og fór í Austurbæ. Það varð ekki til þess að hann hætti í knattspyrnunni þó að handboltaskórnir hafi verið lagðir á hilluna. Gerðu þó vinir hans í Vesturbænum ráð fyrir því að Hreiðar myndi hætta öllu sem tengist íþróttum því sögur voru á þeim tíma um að í Austurbæ Kópavogs væri einungis stunduð griiiiiim drykkja og hórlífi. Eins og Hreiðar segir sjálfur, "Já þeir voru smeykir strákarnir, enda datt ég oft í það á þessu tímabili og var í tómu rugli, en ég hélt þó áfram í fótboltanum".

Þó svo að Hreiðar hafi flust til þá kláraði hann grunnskólanám í Hjallaskóla með sóma og fór í beinu framhaldi í Menntaskólann í Kópavogi. Jafnhliða námi hélt drengurinn sig ávallt við knattspyrnuiðkun og það með Breiðablik, liðinu sem hann hafði hafði æfingar með í upphafi. En það kom sá tími að Blikar gátu ekki kauða. Þá flutti hann sig til Austurbæjarliðsins, liðsins sem oft hefur verið nefnt sem litla liðið í Kópavogi, HK. Þar lék Hreiðar í nokkur tímabil, með fleiri góðum drengjum eins og Árna Þór Eyþórssyni hinum fótbrotna.

Þegar Hreiðar hafði fengið nóg af HK og kó þá var honum boðinn samningur hjá Puma. Strákurinn sló strax til enda ekki úr miklu að moða fyrir kauða. Hreiðar er einn af leikjahæstu mönnum liðsins í dag, en hann hefur spilað fyrir liðið síðan 1998, eða í 10 ár nú í sumar.

Hreiðar verður að heiman á afmælisdaginn og því er ekki gert ráð fyrir Hreiðari í leikinn í kvöld þegar Puma tekur á móti Strumpum í Fagralundi í Kópavogi.

Rit- og framkvæmdarstjórn Puma óskar Hreiðari til hamingju með daginn og vonar að hann hafi það gott í fríinu, en hann verður erlendis næstu tvær vikurnar.

 - Ritstjórn

Með pensilinn í annarri og Goldfinger-Gullið í hinni, hefur Aleksandr Arnarovich formaður Handknattleiksdeildar HK farið hamförum á leikmannamarkaðnum í sumar. Handknattleiksfélag Kópavogs eru svo aldeilis að standa undir nafni þessa dagana og ætla sér gríðarlega hluti á komandi vetri. Félagið hefur lokkað til sín fjölmarga frambærilega leikmenn í endurreisnar-stjórnartíð Arnarovich.

Á meðfylgjandi mynd má sjá Aleksandr með þeim Sverre Jakobsson og Jón Björgvin Pétursson sem hafa gengið formlega frá samningum við úrvalsdeildarlið HK en þeir sömdu báðir til tveggja ára. Sverre kemur heim frá Þýskalandi þar sem hann lék með Gummersbach en hann spilaði með HK fyrir nokkrum árum. Jón Björgvin kemur frá Fram þar sem hann hefur leikið alla tíð.

HK hefur einnig fengið til sín markvörðinn Sveinbjörn Pétursson frá Akureyri (fyrrverandi leikmann Puma) og þá er nánast frágengið að Valdimar Þórsson snýr aftur til Kópavogsliðsins eftir dvöl í Svíþjóð þar sem hann spilaði með IFK Malmö.

Þettta eru sannarlega gleiðfregnir fyrir HK-inga og greinilegt að Aleksandr Arnarovich stýrir deildinni með miklum sóma og óbilandi metnaði. Við vonum eindregið að Alex fari nú að sýna eitthvað svipað af sér þegar hann reimar á sig takkaskóna í sumar. Ónefndur leikmaður Puma lét hafa eftir sér í kjölfar þessarar fréttar, þegar leitað var skoðunar á málinu:
"Alli, hættu að leika þér í manager og kodd´ í fótbolta drengur, hvað er málið? það væri annað ef þú nenntir að æfa eins vel og þú nennir að tuða í símann. Hvað er það næst ...á kannski að liggja í veiði hálft tímabilið líka ha?"
Leikmaðurinn vildi ekki láta nafn síns getið af ótta við óútreiknanlegt skap varnar/miðjumannsins ógurlega (Alexander)

Við óskum Alexanderi og HK-ingum til lukku með þessa nýju liðsmenn og Ritstjórn Puma tippar á að handbolta titlarnir séu klárlega á leið í austurbæ Kópavogs 2009.  

- Ritstjórn

	Sverre og Jón skrifuðu undir hjá HK
Ábyrgðarmaður færslu Tilkynna um óviðeigandi tengingu við frétt

Strumparnir, sem áður voru kallaðir skríplarnir, eru bláar og hvítar skáldsagnarverur sem búa í skógi einhversstaðar í Evrópu. Upprunalega voru Strumparnir teiknaðir af belgíska teiknaranum Peyo, en það var bandaríski framleiðandinn Hanna-Barbera sem gerði seinni mjög svo vinsæla sjónvarpsþætti, sem Laddi talsetti svo á íslensku.

Í ár eru fimmtíu ár frá því að þessar litlu bláu og hvítu persónur litu dagsins ljós, en á þessum fimmtíu árum hafa þær glatt börn um allan heim. Helsti óvinur Strumpana þessi 50 ár hefur verið galdrakallinn Kjartan og illgjarni kötturinn hans, en þeir kumpánar hafa verið á höttunum eftir Strumpunum allt frá upphafi.

Í raunveruleikanum eru hins vegar óvinirnir Strumpa aðrir en Kjartan og kötturinn. Strumparnir leika í dag í Utandeildinni í knattspyrnu og ljóst er að lið sem leika í A-riðli þessarar ágætu deildar hafa ekki hug á því að vingast við þessa kauða.

Strumpar hafa leikið þrjá leiki sem af er sumri, tvo í deild og einn í bikar. Strumpar byrjuðu á því að tapa á móti Kumho, 0-4. Næsti leikur var við Elliða í bikar. Þann leik sigruðu litlu bláhvítu verurnar 3-0. Aftur mættust svo Strumpar og Elliði í deild nú á sunnudag, en þar fóru Strumpar með sigur, 4-2.

Puma leikur við Strumpa mánudaginn næstkomandi, þann 23. júní. Leikurinn hefst klukkan 21:00 og fer fram á heimavelli Puma, í Fagralundi Fossvogsdal.

 - Ritstjórn